Penshun di Biuda(o) i Werfano

Aanvraag Weduwenpensioen

Aanvraag Wezenpensioen
1. Ki ora bo ta sigurá?

Tur hende for di 15 aña ku ta residente di pais Korsou, òf ku no ta residente, pero sinembargo tin ku paga impuesto di entrada (inkomstenbelasting), ta sigurá di un Penshun di AWW.

2. Ki ora bo ta bin na remarke pa un Penshun di Biuda òf Biudo?

Ora bo esposo òf esposa fayesé i na momento di fayesementu por konsider’e komo sigurá, i si e no tin 65 aña ainda, bo ta bin na remarke pa un Penshun di AWW.

3. Ki ora yunan ta bin na remarke pa un Penshun di Wérfano?

Ora e hòmber òf muhé ku ta sigurá fayesé, e yunan legítimo, legalisá, ilegítimo i rekonosé ta bini na remarke pa un Penshun di Wérfano. Yunan di 15 te 25 aña tin derecho riba Penshun di Wérfano, si nan ta inválido òf si tur nan tempu òf un gran parti di esaki ta dediká na estudio. Den e kaso aki e wérfano mester por mustra un deklarashon di skol – ‘schoolverklaring’ -, ku e ta bai skol ainda. Pa yunan ilegítimo ta importante pa entregá un prueba di mantenshon (prueba di voogdijraad, fayo hudisial, òf akta outéntiko), òf ku nan tabata biba den un relashon di famia huntu ku e homber ku a fayesé.

4. Kon haltu e Penshun di Biuda òf Biudo ta?

E altura di e Penshun di AWW ta dependé di e edat di esun ku tin derecho riba dje.

5. Na ki momentu e derecho riba penshun ta inisiá?

Ta otorgá e penshun despues ku a solisitá pa esaki, i e penshun ta inisiá riba e promé dia di e luna ku ta sigui esun den kua e derecho riba penshun a kuminsá. E derechi no por kuminsá mas tempran ku 12 luna antes di e promé dia di e luna ku ta sigui esun den kua a entregá e petishon òf den kua a otorg’e ofisialmente.

6. Ki ora bo no tin derechi riba un Penshun di Biuda òf Biudo?

  • Si e matrimonio a tuma lugá despues ku bo esposo/esposa a yega na e edat ku e tin derecho riba penshun.
  • Si bo a wordu sentensia pa morto di bo kasa.
  • Si bo esposo/a nunka tabata sigura promé e kumpli 65 aña.

7. Ki ora ta retirá e Penshun di Biuda òf Biudo?

Ora e persona bolbe kasa, ora e yega e edat di 65 aña i ora e fayesé ta retirá e penshun. Ora e viudo òf viuda bolbe kasa, ta pag’e un suma di diesdos bes e suma di penshun mensual.

8. Kon ta paga e Penshun di Biuda i Biudo?

Via Banko. No por paga e términonan di e penshun ku no a wòrdu kobrá denter di dos aña despues di e promé dia riba kua por a kobra nan.