AVBZ (Lei di Labizjan)

Kiko lei di Labizjan – (AVBZ) ta enserá?

E lei AVBZ (Algemene Verzekering Bijzondere Ziektekosten), mihó konosí komo Lei di Labizjan, ta un seguro general basa riba prinsipio di solidaridat. A introdusí e lei na yanüari 1997 i e ta kubri riesgo di gastu pa kuido, hopi bes pa bida largu, di esnan ku ta malu durante hopi tempu i di esnan desabilitá. Ta trata aki di:

Tratamentu, kuido i guia di persona ku enfermedat físiko króniko, persona ku enfermedat síkiko i persona mentalmente òf físikamente desabilitá ku ta kumpli ku sierto kriterio i komo tal tin derechi riba kuido di akuerdo ku Lei di Labizjan.

Kon ta kubri gastunan di Lei di Labizjan?

Gastunan dje kuido aki ta ser kubri fo’i dje Fondo Lei di Labizjan, manehá pa Banko di Seguro Sosial (SVB), ku ta e órgano ehekutivo pa Lei di Labizjan.

Ken ta paga prima?

Tur hende den servisio pagá ta kontribuí den e fondo aki pagando un prima fo’i nan entrada: 1,5% ta kore pa kuenta di e trahadó i 0,5% pa dunadó di trabou. Prima total ta 2%. Penshonado ta paga 1,5%.  Pa personanan den servisio pagá ta dunadó di trabou ta retené e prima aki i entreg’é na Ontvanger. Pa personanan ku ta kai bou di areglo di impuesto riba entrada, Inspektor di impuesto ta kobra 2% riba entrada neto i ontvanger ta retené esaki. Si den 2017 e entrada ta mas ku Naf.459.382,49, no ta paga prima riba e montante ku ta surpasá e suma aki.

Ken por hasi apelashon riba kuido segun Lei di Labizjan?

Siudadanonan di Kòrsou (ku eksepshon di algun kaso deskribí den Ordenansa di lei di Gobièrnu Sentral) i no-siudadano ku ta traha den servisio pagá i ku ta someté na paga impuesto riba salario.

Ken ta supervisá e órgano di ehekushon?

Supervishon riba prinsipalmente e aspektonan finansiero i esnan direktamente relashoná ku e órgano di ehekushon, ta na enkargo di Banko Sentral di Kòrsou i Sint Maarten.

Deskripshon di kuido

Kiko kuido di Lei di Labizjan ta enserá?

Aseguradonan por apelá, bou di sierto kondishonnan deskribí den lei, riba diferente forma di kuido kategorisá segun nesesidat di kuido den kuater grupo di hende enfermo i desabilitá:

Kategoria I: persona ku enfermedat físiko króniko

Kategoria II: persona físikamente desabilitá

Kategoria III: persona ku enfermedat sikiátriko

Kategoria IV: persona mentalmente desabilitá

 

Kategoria I: Persona ku enfermedat físiko króniko

Kiko ta enfermedat físiko króniko?

Un persona ku komo konsekuensha di un enfermedat króniko òf un komplikashon a bira dje dependiente di kuido ku e no por mantené su mes den forma independiente den komunidat i p’esei a bira kompletamente dependiente di yudansa. Un persona ku un enfermedat króniko manera por ehèmpel pashènt di nir, reumatismo òf suku ku danki na tratamentu spesífiko (por ehèmpel diálisis di nir, remedi) por funshoná normalmente (por ehèmpel traha òf hasi trabou di kas) i p’esei no mester di kuido, no ta konsiderá pues komo persona ku enfermedat físiko króniko.

Kon ta determiná grado di dependensha di kuido?

Un método generalmente aseptá pa determiná grado di dependensha di kuido ta, husga kon leu un hende ta kapas òf no na hasi sierto akshon (aktividat) normal, sea su so òf ku yudansa di otro. E aktividatnan aki yama ‘Aktividatnan di Bida Diario’ (Activities of Daily Living) abreviá ADL. Ta husga segun e sistema di skor ku ta sigui:

 

ADL No ta posibel Posibel ku yudansa Independiente Skor
0 1 2 3
1. Sinta
2. subi/baha fo’i kama
3. baña/ducha
4. bisti/kita paña
5. bai tualèt
6. kome/bebe
Total

Ta yena i konta skor segun rúbrika. E total ta e skor ADL. Ta konsiderá un hende dependiente di yudansa si e tin un skor ADL di 5 òf mas abou.

Kua kuido ta ofresé na persona ku enfermedat físiko króniko?

Kuido den un hospital general, un kas di kuido òf di enfermeria di bario (wijkverpleging).

Hospital general

Kontinuashon di tratamentu den un hospital general di un persona ku enfermedat físiko króniko despues di estadia sin interupshon di por lo ménos 365 dia den un hospital; tambe reanudá tratamentu despues di sali fo’i hospital despues di 365 dia si bolbe drenta hospital pa e mesun enfermedat denter di un periodo di 182 dia. (Sehos, Advent Ziekenhuis).

Kas di kuido

Tratamentu òf kuido di persona ku enfermedat króniko den un kas di kuido. E asegurado segun Lei di Labizjan tin di kumpli ku kriterio (pa interná) dje kas di kuido òf kas pa ansiano ku funshon di kas di kuido pa por ser interna.

Ehèmpel: Kas di kuido Betesda/ Hamied

Kuido integral na kas òf kuido di enfermeria di bario

Kuido na kas pa un persona ku enfermedat físiko króniko ku tin 90 dia ta haña kuido kaba.

Ta trata mayoria bes di yudansa den sentido di:

kuido físiko i higiéniko; (baña, kuido na kama)

aktividatnan tékniko di enfermeria: (infuus, clysma, kuida herida).

Wijkverpleging

 

Kategoria II: Persona físikamente desabilitá

Kiko ta físikamente desabilitá?

Un persona físikamente desabilitá den sentido di Lei di labizjan ta un persona ku un parti di kurpa òf ku kurpa disfunshonal òf afunshonal ku no por rekuperá ku tratamentu pa rehabilitashon òf training, motibu pa kua e persona aki no por funshoná independiente i motibu pa kua su aktividatnan diario ta kronikamente dependiente di yudansa òf medionan artifisial di yudansa.

Kua kuido ta ofresé na persona físikamente desabilitá?

Kuido den un institushon, òf na kas pa pasa dia òf kas di un organisashon pa kuido integral na kas òf enfermeria di bario.

Institushon

Tratamentu òf kuido di persona físikamente desabilitá den un institushon pa esnan físikamente desabilitá. Pa e kategoria di kuido aki tin solamente un institushon pa mucha fo’i 0 aña. Pa adulto tin un tipo di institushon asina na Kòrsou.

Ehèmpel: Mgr. Verriet Instituut, Fundashon Kontakto

Kas pa pasa dia

Kuido i guia di persona desabilitá ku ta biba na kas normalmente, ku ta risibí i atendé pa pasa dia den siman i duna tratamentu kaminda ta nesesario di fisioterapia, ergoterapia i logopedia.

Ehèmpel: Mgr. Verriet Instituut

Kuido integral na kas òf enfermeria di bario

Kuido i guia na kas pa persona físikamente desabilitá.

Ta trata mayoria bes di persona ku un:

afekshon paralisante ku el a nase kuné òf desabilidat ku el a haña pa motibu di enfermedat òf desgrasia.

Ta trata mayoria bes di yudansa den sentido di:

kuido físiko i higiéniko; (baña, kuido na kama)

aktividatnan tékniko di enfermeria; (infuus, clysma, kuida herida).

Wijkverpleging

 

Kategoria III: Persona ku enfermedat sikiátriko

Kiko ta enfermedat sikiátriko?

Un persona ku enfermedat sikiátriko ta un persona ku ta sufri di un enfermedat mental riba kua por apliká un diagnósis sikiátriko vigente den klasifikashon internashonal di enfermedatnan sikiátriko (ICD-10 òf DSM IV).

Kua kuido ta ofresé na persona ku enfermedat sikiátriko?

Kuido den un hospital sikiátriko, un kas ku funshon remplasante di famia, un kas pa pasa dia, un sentro di aktividat òf kuido na kas pa un organisashon pa kuido integral na kas òf enfermeria di bario.

Hospital sikiátriko

Tratamentu i kuido di persona ku enfermedat sikiátriko den un hospital sikiátriko te asina leu ku esaki ta surpasá un periodo sin interupshon di por lo ménos 90 dia den un hospital sikiátriko.

Ehèmpel: Klínika Dr. D.R. Capriles

Kas ku funshon remplasante di famia

Tratamentu i kuido di persona ku enfermedat sikiátriko den un kas ku funshon remplasante di famia pa persona ku enfermedat sikiátriko.

Kas pa pasa dia

Tratamentu i guia di persona ku enfermedat sikiátriko den un kas pa pasa dia òf sentro di aktividat pa persona ku enfermedat sikiátriko.

 

Kategoria IV: Persona mentalmente desabilitá

Ken ta mentalmente desabilitá?

Un persona mentalmente desabilitá ta un persona ku a nase ku un defekto den su funshonnan mental òf a atkirí esaki, kousá pa un malesa òf aksidente durante su añanan di desaroyo òf despues di e añanan aki. Serka e persona aki e defisiensia mental ta loke ta resaltá mas i loke ta difikultá, si no imposibilitá su adaptashon sosial.

Kua kuido ta ofresé un persona mentalmente desabilitá?

Kuido den un institushon, kas ku funshon remplasante di famia, kas pa pasa dia, sentro di aktividat i kuido na kas pa un organisashon pa kuido integral òf enfermeria di bario.

Institushon

Tratamentu i kuido di persona mentalmente desabilitá den un institushon pa persona mentalmente desabilitá.

Ehèmpel: SGR-groep

Kas ku funshon remplasante di famia

Kuido i guia di persona mentalmente desabilitá den un kas ku funshon remplasante di famia bou di supervishon.

Kas pa pasa dia

Kuido i guia di persona mentalmente desabilitá den un kas pa pasa dia òf sentro di aktividat pa persona mentalmente desabilitá.

Ehèmpel: SGR-groep

 

Kon yega na e kuido deseá?

Pidi kuido di Lei di Labizjan

Pa bini na remarke pa kuido segun Lei di Labizjan mester ta habitante di Kòrsou, loke mester prueba tambe, por ehèmpel ku prueba di registrashon na Kranshi, sédula bálido i karchi di seguro.

Mester entrega petishon serka e órgano di ehekushon SVB. Ta usa formulario spesial pa e petishonnan aki. Ta hasi distinshon entre petishon pa kuido den un institushon, pa kuido na kas. Den tur kaso ku interná un persona den un institushon intra òf semi-mural òf si e ta bini na remarke pa bishita un kas pa pasa dia òf sentro di aktividat, ta e institushon en kuestion ta entregá e petishon na SVB.

Pa regla ta enfermeria di bario (wijkverpleging) ta entregá petishon pa kuido na kas den kolaborashon ku dòkter di kas. Pa e petishonnan aki tin formulario spesial disponibel serka tur organisashon pa enfermeria di bario òf organisashon pa kuido na kas. Mester yena e formularionan aki kompletu, inkluso skor ADL, diagnósis médiko i eventual estado síkiko dje persona en kuestion.

Kon ta trata petishon?

Komishon di Indikashon ta trata tur petishon pa kuido segun Lei di Labizjan. E komishon aki ta konsistí di tres miembro: un médiko, un enfermero i un trahadó sosial ku pa regla ta reuní tur siman. Nan ta verifiká si e persona pa ken ta pidi kuido ta den tal estado – por ehèmpel grado di dependensha di yudansa òf di desabilidat – ku e ta kumpli ku eksigenshanan pa kuido segun lei di Labizjan. E komishon ta duna konseho na direktor di SVB ken ta tuma desishon si ta suministrá òf ninga e kuido. E ta hasi esaki pa medio di un deklarashon por eskrito ku ta manda pa e persona en kuestion. Por hañá derecho di kuido atraves di lei di labizjan solamente si segun lei no por haña kuido atraves di un òf otro seguro sea partikular òf públiko (artíkulo 5.4)

Kiko hasi si no ta di akuerdo ku rechaso di kuido?

E persona ku interes en kuestion ku tin opheshon kontra rechaso di un petishon pa kuido segun Lei di Labizjan por entregá serka direktor di SVB denter di 6 siman despues di fecha dje karta di rechaso un karta di opheshon ku ta inkluí su motibunan. Riba esaki SVB mester reakshoná denter di 6 siman. Den kaso di un desishon negativo di SVB riba e karta di opheshon por apelá pa medio di karta denter di 6 siman despues di su fecha serka LAR (Landsverordening Administratieve Rechtspraak) ku ta disidí komo órgano úniko i mayó.

Informashon adishonal

Kiko ta e areglo di kontribushon propio?

Di tur persona penshonado ku ta kobra penshun di behes, òf penshonado biuda/biudo (AOV/AWW) den un institushon intramural SVB ta retené nan penshun komo kontribushon propio. Pa sierto fasilidat den kuido ekstramural (por ehèmpel enfermeria di bario) por eksihí un kontribushon propio, dependé di entrada dje persona.

Kiko ta kontrato di kuido?

Komo órgano di ehekushon pa Lei di Labizjan SVB a sera kontrato di kuido ku tur institushon i organisashon ku ta duna kuido segun Lei di Labizjan. E kontratonan di kuido aki ta enserá:

  1. un deskripshon di formanan di kuido ku ta duna
  2. volúmen i kalidat korekto dje kuido
  3. presupuesto korespondiente
  4. diferente kondishon ku partidonan mester kumpli kuné, entre nan duna kuenta na otro i e obligashonnan finansiero.

Ta sera e kontrato di kuido pa un periodo di 4 aña máksimo. Den e kontrato ta kumbiní un presupuesto pa 4 aña. Un médiko i un enfermero ku eksperensha ta evaluá pa SVB kalidat dje kuido duna riba un base regular.

Aktividatnan tékniko di enfermeria:

A.P. – U.P. verzorgen

Catheteriseren

Clysma geven

Flatus- canule inbrengen

Hechtingen verwijderen

Infuus toedienen

Manueel faeces verwijderen

PEG-Catheter verzorgen

Protheseoog verzorgen

Prothese-stemband verzorgen

Pubis-Catheter verzorgen

Slijm uitzuigen

Sonde inbrengen

Stomp zwachtelen

Trachea-canule verzorgen

Wondverpleging

Zuurstof verzorgen